دقيه حداد ...للشاعر / قطب صلاح رمضان الشريف

انسان مصلوب .. انسان مظلوم
دقت النظره .. لقيته جماد
لكن جواه علامات .. وهموم
وقفت قصاده دقيقه حداد
كان دمعه بيلعن شئ مجهول
وحكايه حزينه وشمع انقاد
انا باروى حكايته لكل الناس
ازاى يتعلم يبقى كبير
واتعلم يبنى بلاده بحب
علشان جوه القلب ضمير
كان صاحب مبدأ عايش بيه
والمبدأ شئ فى حياته خطير
وسياسته يدوبك حريه
كان عارف معنى التضحيه
كان عربى .. ومصرى
وكان مسلم
وشعاره الامه العربية
خفافيش الليل حكموا بلاده
قام ثار قدام خفافيش الليل
ما رضيش بالذل وعاش راجل
ولا عمره هيرضى يعيشها ذليل
وباسم الدين حكموا بلاده
كان دين مخصوص معمول تفصيل
خفافيش الليل زى الدبابير
كان واقف ليها بكل ثبات
ما قدرش يوافق على التغير
ما قبلش يطاطى لحد ما مات
كان مصرى بكل ما فيه من روح
عاش ع المبدأ وبكل ثبات
صلبوه قدام الناس خايفين
باسم الحريه الراجل مات
انسان مصلوب .. انسان مغصوب
وقت النظره .. لقيته جماد
ولقيت الناس واقفين باكيين
فوقفت عشانه دقيقه حداد

آخر ما كتبت انا قطب صلاح رمضان الشريف
الي ابن بلدي الذي سكن قلبي والذي دائمآ وبدون اسباب عندما اتذكره ابكي لوحدي شهيد الواجب الوطني
سيادة النقيب الشهيد محمد أيمن بيومي لن أنساك