رب الأسره يا واحد ميم
إحمي ولادك من غير خوف
إرسم جنّه شجرها نعيم
وانده تلقى قلوبنا صفوف
خلّي الحب يكون سِكّتنا
واسمع من غير ما تسكّتنا
دانت ولّيّ الأمر ف بيتنا
خلّي أوامرك بالمعروف
***
رب الأسره يا واحد ميم
لم ولادك بين أحضانك
د احنا نفوت من قلب جحيم
علشان لمّتنا وعلشانك
واحنا أسود حاميين الدار
ودروع واقفه قصاد النار
إفتح قلبك لينا عمار
وافرد إيدك للملهوف
م انت وليّ الأمر ف بيتنا
خلّي أوامرك بالمعروف
***
رب الأسره يا واحد ميم
ما تخلّيش الخوف جوّانا
خلّيك وقت الحر نسيم
د احنا معاك خلّيك ويّانا
م انت القائد واحنا ولادك
واحنا اللي بنستنّى ميعادك
خلّي ف قلب قلوبنا حياتك
رح تلقانا عيون الشوف
م انت وليّ الأمر ف بيتنا
خلّي أوامرك بالمعروف
سيد منير عطيه
عضو اتحاد كتاب مصر
ليست هناك تعليقات:
إرسال تعليق