* تستاهل *بقلم المبدع /حسام *شاعر الحياة*

* تستاهل *

يا قلبي انت اللي تستاهل
أكتر م اللي يجرالك

هواه طايش
معاه عايش.. ومش عايش
ولسه ناره تحلالك

مشيت في ضباب
عشقت سراب
وفاكر عشقه بالساهل
وعمره ف يوم ما أوحالك؟

بأن هواك سكن قلبه
وإن مشاعره حنالك

ولا قالها صريحه ف يوم
ولا حتى بصوت مهزوم

ورغم دا كله تشتاقله
ولا فارق في يوم بالك؟!

صحيح مجنون وتستاهل
تتوه في هواه
وأكتر م اللي يجرالك

يا قلبي إعقل....
دا مين كان قال أكيد حبك
هواه كان وهم في خيالك

صحيح انت عشقت أكيد
وهو يدوب يدوب لحظه

يفكر في هواك لحظه
ينادي عليك يتوه بالك

ولو مره سكت قلبك
في لحظه يقول..
حسام... مالك؟!

واقول مماليش..
ولا حاجه..
أكيد فاكر ( ولا حاجه)
هنيالك!

لاااوالله و لا فاكر
ولا حاسس كدا بحاجه
سيبني وروح بقى لحالك

دا قلبي لسه مش عاوز
يصدق انك المجهول
وإن العشق مش حالك

يا قلبي اعقل..
إيه خلاك تروح عنده؟
يزيد عشقك.. يزيد عنده

ولا تعرف إذا كان هو بيحبك
أو انت يدوب حروف كلمه
بيحلاله يدندنها... ويحلالك

يا قلبي قولي إيه صابك
ما كنت وحيد..
ونبضك كان على قدك

تشبك م الحروف كلمه
وترسم ع القلوب بسمه
وجاه هدك..

ولسه سؤاله بيطنطن..
حسام... مالك؟!

يا قلبي ارجع
مشيت في طريق
عليه يافطة ( طريق مسدود)!
عملت فيها مش فاهم
وروحت قاريها بمزاجك..
( طريقه ورود)

مشيت ومشيت..
وفي الآخر لقيت يافطة
كاتبلك هو جواها..
( يا عايش وهم في خيالك.. لف وعود)!

سقيته الشهد من قلبي..
وسكنته في أحضاني...
سقاني المر يا قلبي
وسكني في أحزاني..

يا قلبي اعقل...
ولا تحزن..
ولا تبكي...
ولا تسأل..
لقانا كان جميل جداً
وصدقني الفراق أجمل.

ولو صممت...
تمشي السكه للآخر...
هسيب الدنيا كرمالك..

وانت هتبقى يومها أكيد
جنيت بهواها على حالك..
وإنت ساعتها تستاهل...
تعيش مهزوم
وأكتر م اللي يجرالك.
*حسام.