الفين حكاية ع الودان ..بقلم أ . سميرة حمودي

الفين حكاية ع الودان
خلتنا نتمني  الصمم
حدوتة توجع في الضمير
حدوتة  تخبط  ف الهمم
الرغي زاد قرب معاد
المطحنة
كل الحكاوي ع العباد
يا خلق اضحت ممكنة
صوت من هنا
 وصوت من هنا
والكل باع
متجيبش همك ع الصداع
ماتقلش فين حتي الدوا
الرحمة غرقت والشراع
ضاع في الهوي
والحلم خطي المستحيل
لملم وجوده للرحيل
علي متن اخر مركبة
كل  المواني مكركبة
وماتندميش ياطيبة
علي زرع مات
الساقية نشفت والنبات
ايه ذنبه ميت م العطش
كل اللي متخبي اتفتش
ليه قاعدة تبكي ع البذور
ما البذر علي الارض اتفرش
والسر بان
مليون حكاية    من زمان
مرسومة رسمة مشخبطة
كل الحكاوي ملخبطة
وانتي كمان متلخبطة
واهو كله مكتوب علي الجبين
تمشي حزينة  مدمعة
والغربة فيك مجمعة وجع
السنين
سدي ودانك م الالم
كل اللي كان راح وانعدم
حتي اللي جاي من اوله
بعيد ماحد بيوصله
وسط الصخب
م الدنيا هاتشوفي العجب
م الدنيا هاندوقي المرار
خطي حواجز الانكسار
فوق الحديت والنمنمة
فوق ف السما
لا تقولي جايز انما
ولا قبلما ولا بعدما
ماتقدميش المظلمة
كل الحكاوي اثمة
داري الحقيقة المبهمة
بين السحاب
هايفيد بايه كتر العتاب
ما العدل غاب
والليلة خلصت م زمان
وانتي سقطي في الامتحان
من قبل حتي مايبتدي
فمدي طولك ع الكفن
لفيه عليك ومددي
فكي اللسان اللي اتمسك
وعليكي يلا اتشهدي
فوق وابعدي
فوق في السما
فوق الحديت والنمنمة
لا تقولي جايز انما
ولا قبلما ولا بعدما
كل الحكاوي اثمة
داري الحقيقة المبهمة
بين السحاب

سميرة محمودي شاعرة الريف