(بين قوسين) كلمات الشاعر -- سيد منير عطيه

بين قوسين
.............
بعد الشروق ييجي الغروب
والضلمه تتسحّب عشان
تفرش ستاير ع البشر
كل الملامح تختفي
تغمّق ف العين الصور
وتحس إن الناس خلاص
ما بقيتش ناس
صبحت يادوب تماثيل حجر
وان اللي كان معجون بياض
ف سواد غريب فجأه انحشر
الضلمه طعم الإنكسار
حتى النهار ..
قُدّام سيوفها بينكسر
بس القمر ..
 جيش ما انهزمش

قادر يخوض الموقعه
لا عُمره كان مخلوق جبان
ولا ف الشدايد إمّعه
ضيُّه الجميل ..
واضح كما فارس نبيل
بيخُش جوّه المعمعه
ويهد دا الليل الكئيب
يمسح جروح الناس .. تطيب
ويعدّي بيهم م الخطر
وانا قلبي ف الليل الحزين
شافك قمر
وفردت حُضني لضحكتك
تعمل ممر
وتخُش ف الشريان تدور
وفتحت قلبي لطرف نور 

ودخلتي يا بدر البدور

جوّايا م الشوق تشربي

يا حبيبتي أكتر قرّبي
زيحي الضلام المنتشر
دنا قلبي سهران للسحر
بيغنّي موال الحنين
كما جمله قاعده بين قوسين
دقّاته هيّ المبتدأ
وانتي اللي للجمله الخبر
دي الجمله ناقصه ومُبهمه
بوجودك انتي ح تكتمل
واليأس عين صابها العمى
عالجيها بحبوب الأمل
د انا قلبي عابد مُبتهل
بيوزّع الكرامات غُنا
ويقضّي طول الليل سهر
 ضُمّيه ف حُضنك بالقوي

محتاج ف حُضنك أتعصر
خبّيني من زحف الغيوم
واحميني من برد المطر
ييجي الغروب ما يهمنيش
م انا جوّه نور حُضنك ح اعيش
وانا جوّه حُضنك ح احتضر
دي الجمله خرجت م القوسين
والمبتدأ .. جالُه الخبر
صبح اكتمالي شئ أكيد
من بعد ما ... ضحك القدر
 سيد منيرعطيه