التار مش بالكلام
والدم قُصاده دم
دا الدم ان كان حرام
ف حرام نسكت ياعم
إبنك يا بلدنا واقف
يحميكي ع الحدود
على كتفه سلاح وحالف
يحرس أرض الجدود
مش همه الموت عشانك
ف الموت شاف الخلود
واكمنُّه يابلدي إبنك
واكمنُّه حتّه منك
شايل ع الكتف همّك
نايم فوق البارود
ف ازاي من قلب ناسك
تخرج تعابين بسم
دا الدم ان كان حرام
ف حرام نسكت يا عم
يا طير واقف بتبكي
ع النخل وع الجريد
شايف ع الأرض ساجد
لله دم الشهيد
إبنك لو مات يا بلدي
هيعود مولود جديد
دمّه هيروي السنابل
تطرح أزهار قنابل
خلّي الأعداء تقابل
كوابيس من بطن حلم
دا الدم ان كان حرام
ف حرام نسكت ياعم
يا فجر ف إيده ضحكه
بتصبّح ع الجيران
على بلدي عدّي سلّم
واحضنها ف الأدان
دا الخير من صدر نيلها
راضع سرسوب أمان
لسّه دراع الغلابه
قادر يمحي الديابه
كل اللي فات سحابه
عدّت فوق الهرم
دا الدم ان كان حرام
ف حرام .. نسكت ياعم
سيد منيرعطيه
من ديوان (منتهى اللذه)
ليست هناك تعليقات:
إرسال تعليق