**اسرار **بقلم الشاعر /عونى_هشام**

اسراء
========== عونى هشام
ترمس حمص طعمه لذيذ
شفت حروف كان لها تمييز
فيها معانى هواها اشجانى
فيها بساطه بدون تعجيز

سألت عرفت دا من اسراء
تركب حرف بكل ذكاء
قريت وقريت ورجعت قريت
لقيت الحرف يشع ضياء

قلت اهى بنتى اتعكز بيها
تمشى معايا ربنا يهديها
اقول لها حرف ترد قصيده
قلت ف نفسى اسم الله عليها

نادتنى يا بابا قلت يا بنتى
قالت الحرف معايا حكايه
هو شراع وانت سفينتى
امشى معاك وتكون دى بدايه

قلت تعالى وفتحى مخك
بس الاول شوفى مدرستك
قالت حاضر وعد دا منى
قلت خلاص حضرى كراستك

اسراء بنتى بقالها زمان
من اعدادى للجامعه كمان
بنت رقيقه وعارفه واجبها
وبرضه عنيده فى العند جنان

بس بترجع تانى تراضينى
عمر ما جابت دمعه بعينى
وان كشرت ف وشها يوم
ارجع اقول لها حبة عينى

دى اسراء والجد امام
الاب احمد عالى مقام
نسلها طيب بنت اصول
يوم ف الشعر هتبقى امام

كل ابياتها يا ناس عجبتنى
وافرح لو جه يوم غلبتنى
بس عنادها بيغلبنى
وياما كتير وياها تعبتنى

برضه حقيقه وكلمة حق
ناس حاربوها من غير حق
وهيا تواجه وباصرار
وتقول ارجع ؟ اقول لها لأ
==========
عوني هشام
اهداء الى ابنتى وتلميذتى اسراء امام مع كل التقدير