عصر المشانق...رضا ابو الغيط

انتهي عصر المشانق
والمحارق والبسوس
واللي باقي عصر خانق
حبله مفتول بالفلوس
ماشي يرمح ف المدينه
بالحصان ابن اللذين
فوق رقاب كل الضحايا
ليل نهار عمال يدوس

ف المدينه الكل خايف
م الحصان ابن اللذين
واللي عارف واللي شايف
عاش حياه صعبه وحزينه
والكلام فوق الشفايف
والدموع اللي ف عينينا
خايفه تصرخ م الرحايا
والطاحونه والقادوس
وسط غابه م المخالب
انتهي عصر الطيابه
والديابه والتعالب
ماشيه تنهش ف الغلابه
واللي فاضل مني دمعه
من زمن عصر الماجوس
ع اللي كان ف الدنيا شمعه
وانحني تحت الفلوس
واللي فاضل م الأفاضل
قلبه رافض يوم يناضل
اصله خايف م الأفاعي
والدواعي ف النفوس
والشجر.. قاعد بيبكي
للفروع الدبلانين
والجدور م الخوف بتشكي
والحياه أغلبها سوس
الدولار عمال بياكل
ف الجنيه صاحب المشاكل
والفراغ ويا التواكل
سهم صاب كل النفوس
لو فضلنا نمد ايدنا
للي حابب يبقي سيدنا
فجر بكره هيخاصمنا
وتنسرق منا الشموس
يلا نبدأ .....ف التحدي
لجل ما الليل ده يعدي
والشموس ترجع لأرضي
شايله ف ايدها ف الفؤوس
يلا نزرع رمل سينا
بكره يطرح خيره لينا
والعيال وسط المدينه
تمشي تاني بالفانوس
*******************
رضا ابو الغيط