( ألم الغروب )بقلم الشاعر/رضا أبو الغيط**

( ألم الغروب )
**************
الشمس طلت م السما
متوسمه
تسكن حواري قلبنا
وف ايدها شايله الأوسمه
للي مناه يسكن هنا
داخل عيون متعشمه
تلقي السعاده والهنا
الشمس شايله الأوسمه
للي مناه يلقي الحياه
بين الثنايا ف حضننا
وأنا لسه واقف ف المدي
سامع صدي
صوت الأنين من جرحنا

خيط الخطاوي اللي انقطع
لحظة وجع
كل القلوب المغرمه
خايف يقرب م الفضا
والفضفضه
خايفه تقرب م المدار
لحظة فرار
الشمس من عمق الوريد
لحظة غروب كل الأماني الملهمه
الشمس طلت م السما
وانا لسه واقف ف انتظار
آخد قرار
واكتب بقلمي اللي انكسر
آخر فصول الملحمه

علي شط نهر الملتقي
قلبي انتقي
أحلي عيون متبسمه
وفتح لها كل السكك للأورده
وف لحظة عبور الحب
جوه الأفئده
سامع أنا
صوت نبض قلبي اللي انكوي
بيقولها
فين الدوا.....فين الهنا......؟؟؟
وانتي اللي غيبتي من سنه

وابتدي بينا العتاب
يفرد قلوعه ع الكلام
والحزن ع القلب اللي داب
غطا علي صوت الغرام
والدمعه تايهه ع الخدود
بين صبح لسه بيتولد جوه القلوب
وتوب حزين
ع اللي اختفي لحظه غروب
الدمعه تايهه ع الخدود
بين لحظتين
لحظة لقا ..ولحظه هروب

الشمس طلت م السما
وانا لسه واقف مطرحي
بتشد أطرافي إنما
خايف أفارق مسرحي
خايف أنا
من تاني قلبي تجرحي
وتروحي
خايف أنا
ألم الغروب
يكتب نهايتي المؤلمه

***************************
رضا أبو الغيط