**الله عليه شهد مكرر**بقلم الشاعر /رضا أبو الغيط**

**الله عليه شهد مكرر**
حفيد عسل زى السكر
يا رب تمم افرحنا
فرحنا بيه أكتر واكتر

هاتى أما اشيله علي كتافي
ناولينى يالا وما تخافي
ما هو قبل منه كانت امه
واخده كتير من أوصافي

الله عليه... ابن الغاليين
النظره منه.. تسر العين
يارب بارك ف حفيدى
من شرعين كل الحاسدين

هاتى القمر يسكن حضنى
ويبات معايا الليل كله
من بكره ليه هزرع وابنى
وأستنى منه الخير كله

ابن الحبيبه اللي هواها
قلبى اللي ساكن جواها
يا رب بارك ف حفيدى
يا رب بارك ف ضناها

قيدوا الشموع بلوا الشربات
لحفيد عسل زى الشربات
وهو لسه ......ف اللفه
حواليه صفوف من أحلى بنات

‏قيدو الشموع وافرحو غنوا
خلو الحبايب يتهنو
مولود سعيد زارهم في البيت
ربي ما يحرمهم منه‏

‏اسمع كلام بابا يا نونو
وجدو رضا لجل عيونه
واسمع كلام كل الحلوين
اللي لا يقسو ولا يخونو‏

‏رشوا الملح.. ودقوا الهون
دقة .......تسمع كل الكون
زغروتة وادعيله يا تيتة
المولي يحفظ ليه يصون‏

********************************

رضا أبو الغيط