انت مصرى... للشاعر / عونى هشام

  قالولى انت فين من مصر
يا فارد ضحكتك ليا
صعيدى ولا ساكن البحر
معاك عينى ..راحه وجايه

اشوف خطاويك ماشيه بسحر
كأنها ماشيه ع المايه
روايحك جايه نسمة عطر
كأننا صيف فى عصريه
بحيرى الموجه بين ايدك
صعيدى حضاره فى جبينك
ملامحى نوبى مع بدوى
يابدوى ...يا شيخنا عرفينك
يا عم قناوى انا ف عرضك
فى بحرى كتير محبينك
فين ما تروح هنا ارضك
ترابها كحلها ف عينك
يا طه قول هنا موال
صعيدى بحيرى عم وخال
هناك مينا هناك احمس
وعندى برضه شجرة در
ومهما يقولوا مش هايضر
عشان دم الشهيد الحر
اقول بلدى واعدى المحنه
لو كاسى بطعم المر
عرفت انا مين انا مصرى
صعيدى بحيرى من اصلى
هناك خالى وهنا عمى
هنا وهناك فى كل مكان
تلاقى الكل قال حصرى
انا مصرى انا مصرى
========= #عونى_هشام