* اللى باقى *...رضا أبو الغيط

كل اللى باقى م الكلام
حبة حروف متنطورين
فوق السطور ف الكرسات
فوق الضحايا م الأنام
فوق اللي نام تحت الأهات
والمعطيات بتقول حرام
نلقي الكلام ....الحلو مات
كل اللي باقي م الكلام
حبة حروف صابها الأنين ..
.متغربين بين الزوايا والضلوع
حتي العيون
م الانهيار والانكسار
غرقانه في بحر الدموع
ومن سنين
كل الحروف متعلقين
بحبل مفتول م السكات
والصمت متغمس بخوف
خايف يطوف برج الحمام
والحلم مربوط بالظروف
تايه ........وتاه زي الأنام
والانتقام ... أصيح قانون
ومن الجنون
نقتل ف يوم رمز السلام
أو حتي نحرق له الريات

واللي مناه يلقي الحياه
رسم الكلام طوق للنجاه
شال السكوت جوا التابوت
وقال يا ناس احسن نموت
لو يوم يفوت
والحلم مخنوق بالعياط
أو نبكي ع العمر اللي فات
آن الأوان يا شعبنا
تهجر حروفنا صمتنا
آن الأوان نلقي الأمل
راجع ...وشايل حلمنا
وف قلبنا نلقي الأمانى كلها
من فرحها رفعت ايديها لربها
واتبسمت واتوسمت
ف اللي اتولد من حضنها
ف اللى مناه يلقي الحياه
واللي مناه ترجع بلادي لمجدها
وتعود لها أحلي الساعات
مع كل كلمه بتنكتب
من غير ألم من غير أهات
رضا أبو الغيط