تخاريف ...المعتصم بالله

قبل الدموع ماتشد ع الخدين طريق
ولا الخطاوى تروح لمشوار اللقا
انا كنت عيل نام ف احضان الشقا
من غير صديق
رسمت أكوام م الحطب
وبكل ما املك من غضب
أجيت حريق
ف الفقر طعم ال لقمه مر
لو زاد عن حده الشئ يضر
والنور بيكسر رؤية العين اللى طالعه م الضلام
كان نفسى أقول لامى أنا بحبك
وأحضن ف قعدتها الحنان والامان
الحلم قابض روحى كالسجان
والدنيا لون واحد
ان نمت ...يسرق نومى رعدة خوف
وان قمت ..يسرق صحوى هم ظروف
ولو الطريق يتسد مهما تشوف ...
الخطوه محصوره
ماتقيسش فرحة حد ع الضحكه ف الصوره
ولا حالته بالمظهر
الناس حقايق تسكن سرا مابيظهر
ولا ترسموش صوره