قومي يا شايله الهموم
إستحمي ف نهر نيلك
كله كوم والحزن كوم
إوعي أحزانك تشيلك
مهما عنّك فرح غاب
عدّي فوق المستحيل
لسّه أحلامك شباب
لسّه ف عيونك دليل
هِدّي سور الحزن هدّي
فوق جبال الهم عدّي
ياللي أقوى من التحدّي
نادي ع الأفراح تجيلك
واستحمّي ف نهر نيلك
***
ياللي ساكته ما تسكتيش
وارفعي جبينك كرامه
داللي راح ما بيتنسيش
واللي جي محتاجه علامه
تاخدي تار الحق م اللي
دبحوا صوت الحق فيكي
كل شبر وكل مللي
من ترابك بيناديكي
إصحي تاني وصحصحينا
إرفعي بإيدِك إيدينا
يا وطنّا وعايشه فينا
كُلّنا حافظين جميلِك
قومي يا شايله الهموم
واستحمّي ف نهر نيلك
***
إللي مات بإيدين خواته
هاتي حقُّه من الخوات
واللي جوّه الجُحر باتوا
إهدمي جحور الأفات
إللي حاولوا يعطّلوكي
إدفنيهم تحت قدمك
واللي للأحزان جابوكي
إهزميهم بابتسامتِك
واللي عاشوا تحت شمسك
بس جابوا البرد عندك
حطّي راسهم تحت رجلك
خلّي من إسمك دليلك
قومي يا شايله الهموم
واستحمّي ف نهر نيلك
سيد منير عطيه
من ديوان (حاجات مجرمه)
ليست هناك تعليقات:
إرسال تعليق