سر الكلام ..بقلم أ.سلمي

أجمل ما كتبت فى الفترة الماضية ... وفاء وتقدير .....د.سلمي

سلمي ....سر الكلام ...لما ارتاح لعيونك

1

ح احكي ليكم حكاية ..
إنسانه ...وأحده ...
مخلوقه ..
من ملامح براها ...
لا بتشبه الناس المعاها ..
ولا بتلقى شبه تانى
يشبه حلاوة البسمة
فيها ...

2

سلمي ...زى مواسم الفرح الزمان

سلمي ...
زى مواسم خريف ...
تسكن الغيم ..البعيد
وترحل ...
بين البيوت ...
وفى عيون الناس ..
تبتسم ..
تصابح شموس الدنيا ...
فى عينيها ...
يضحك الموج ...
فى الضفاف...
يحضن خصب الأرض ...

سلمي ....
فى حكاوي الناس ...
سر الأغاني ,,,
وكلمات القصائد ...
ساكنه فى جوانا...
من سنين ....
فى ضحكت أولادنا الصغار
وفى أعيادنا ...
وفى خصب الحنين ....

سلمي ......
حاجة من أسرار الكون
حلم ....
زى الخضة لما ترسم فى عيونها
الدهشة ..
تشهق دموع
بالفرحة تحتار ...
فيها العيون

سلمي .....
زى رعشة ..حنين
لما نرتاح فى عيونها ...
نفرد جناح الشوق ...
سفر...
ونحن فى بحر عينيك...
نرحل .....
لمرافئ الشوق
شراعنا ..
ونرتاح ...
من تعب السفر

سلمي ....
فى أنفاسها...
كل الورود تاخد ..نضارة
وتنتشى...
ويفرح فراش .....
يفرد جناح ...
فوق الرحيق ...
حبات ندى ...
يحضن عبير الشوق
معاكِ...

سلمي ....
زى ...الزرع ...
تخضر ...نضارة
فى كل المواسم
دعاش* ..يملأ...
أنفاس الناس ...
سماحة ...ومحبة
ويرسم ....
فى عيون الناس ...
طيبة الخاطر ...
سماح ...

سلمي .....
كل الكلام ......
والحروف .....
ترحل معاكِ ....
زى الغيم والمطر
والكون ...
فى عيونك يكون السكون

سلمي ....
زى المستحيل ...
تكون فى القلوب قريبه...
وتصابحك ...فى الخيال..
ملامح ...
فى حضورها ...
ويكون فى جواك ..
الشوق ..دموع

سلمي ...
بين القلوب ...والشوق
والحضور ...
مسافة ..احلامنا ..
ومنانا

سلمي ...
ما ....زى كل البنات ...
سلمي ...
يخلص ...عندها ...كل الكلام ...
ويقيف الوصف...

* الدعاش (رايحة الارض المبتله بزخات مطر تحملها الريح (الفجر) الى المناطق البعيده ، وتحمل معها رايحة الزرع والخضرة على نسمة الفجر فى مواسم الخريف فى السودان)