حب_متفصل_عليك ...محمد الخضرى

إحساس غريب ؛
لما بشوفك كل حاجة ف دنيتى ؛
بلقاك غريب
وقت اما اكون باتمنى حضنك ؛
وشئ عجيب
إنى ساعتها
بيبقى نفسى انك تدوب ف محبتي
أو ع الاقل ... اسمع منك ضحكتك ؛
بلقاك حبيب
حتى لما تكون زعلت
ولما تنزل دمعتك
بتزيد ف قلبى محبتك ؛
وبطير معاك وسط الحياة
والدنيا مش قادرة تجارينا ف الهوى
ولا سهام الحب قادرة تكسرك
حتى انشرخ سقف السما
لما لقانا يوم لُقانا مجروحين
وكأنه مستني ابتسامتك تنقذه
راحت السما تصلح ما بينا
وابتدت تدعى النجوم
وتنادى على ضي القمر
فتلاقى نوره فيه غيوم
وجه شعاع الشمس
وضيه متحني بهموم
كل الكواكب فى تمرد
لاجل ما تشوف ضحكتك ؛
وانا الوحيد اللى عاجبنى قمصتك ؛
بتزيد ف قلبى كل انواع الشجن
اللى بتوصل القلوب ببعضها
بوصل معاك لدرجة إنى أتنفَسَك ؛
أسلوب حياة ؛
مش قادر أوصل منه
لأى شئ م المحتمل
كل تكاوين الهوى اتكونت
ورَسَمَت معانيها الجميلة
وللأسف .. فوق الجبل
مش قادر اوصل قمته
ووصلت لحدود الهبل
الناس تقول مخه اتلحس
بيحب ف حبيبه الزعل !
وإنت بقمصتك الجنان
وبأحلى دمعة شفتها
وتنهيدة ولا ف الأفلام
هموت واشوف تكشيرة لك
عايزك تمللى تكون حزين
والدمعة ما تفارق عنيك
يبقى الزعل عنوان حياتك
وتخاصمنى وأموت عليك
عايزك تشوفنى تروح مبوز
تلقى بوسة بين عينيك
حبى ليك شئ مختلف
حب متفصل عليك
أرجوك تكون بية معترف
وتكون سعيد باللى احنا فيه
ونخلق حالة من الجنون
وأكون لك فارس موطنك
بقلم "محمد الخضرى "