أنا إسمي المواطن (س)
دخلت الجامعة بالتحـ ـسين
نِجحت وهما مش حاسّين
بدون دوشة وبولِّيكة ..!!
وعندي من العيال قُرطة
وعندي قريب أمين شرطه
ما كلتش يوم من التورته
ولا قرَّبت م الكيكة ..!!
كتير بحياتي بتخاطري
فحاسبي ياريت عشان خاطري
ما فيش عندي حساب قطري
ولا بتدعمني أمريكا ..!!
بدوب وياكي ألحاناً
وبدي الحب مجاناً
وبكتب شعر أحياناً
وبلعب حبة مزيكا ..!!
وبعمل ليكي ألف حساب
يا قاسية تملي ع الأحباب
حقيقي أنا بكره الإرهاب
لكني بحب أبو تريكة ..!!
وأنا إسمي المواطن (ص)
وقفتوا لحلمي بالمرصاد
وقولت أمشي بدل ما أتصاد
فوسَّع لي كده .. سيكا ..!!
أنا مصري .. ومصري وبس
بدون تصنيف
بدون تلوين
كلامي كله من راسي
ولا بجري ولا بتزق
ولا بشتم في أشعاري
ولا بنطق بغير الحق
ولا محتاج لشئ من ده
ولا عايز فلوس من دي
ولا خالي اللي مات تركي
ولا عمي الكبير هندي
ولا محتاج ولا لدية ولا دية
ولا تأشيرة بحريني
ولا بترول سعودية
انا كل اللي عايزه بجد
يدوب سبحة وجلابية
أصلي وادعي ع الظالمين
كما الأم اللي غضبانة
بتدعي كتير علي عيالها
وتكره من يقولوا آمين ..!!
بحب الجيش أوي جداً
ونص أصحابي م الشرطة
لا عمري حلمت أنول منصب
ولا آكل من التورتة
لا عمري رفعت غير علمك
لا عمري فرحت غير بيكي
ولا عندي حساب يورو
ولا بسبوري أمريكي
أنا مصري ..
أنا مصري .. ومصري وبس
بشوفك لحظة تعبانة
فبدعي ربي يشفيكي
وليه ساكنة كتير فيا
لكني لسه مش فيكي
أنا مصري .. ومصري وبس
وزيي ألوف كتير جداً
يدوبك حلمها الأكبر
تعيش فيكي
تموت فيكي
#يتبع
#معتز_عبد_الموجود
من قصيدة "مصري وبس"
ليست هناك تعليقات:
إرسال تعليق